Приветствую Вас Гость | RSS

Республика Кыргызстан, г.Ош

Правозащитный центр "ПРАВОСУДИЕ-ИСТИНА"

Пятница, 2024-03-29, 12:40:37
Главная » 2011 » Июнь » 12 » Қаллоблар ва лаганбардор мунофиқлар - улар фарзандларимиз душманларидир.
23:37:28
Қаллоблар ва лаганбардор мунофиқлар - улар фарзандларимиз душманларидир.
Қаллоблар ва лаганбардор мунофиқлар - улар фарзандларимиз душманларидир.
  (Ақлингизни ва оз бўлса-да илмингизни ишлатинг!) 28.05.2011 й.  

 Бугун, яъни 2011 йил 24 май куни Ўш вилоят судига иш билан кирдим, қайтиб чиқаётганимда, ўтиришган уч қирғиз аёллар мени сўкиб қолишди. Мен уларга қараб ҳам қўймадим-да, ташқарига чиқдим. Биз 4-5 одам, 45-60 ёшдаги одамлар кўчада турганимизда, 4 аёл ва 2 эркак кўчада турган ўзбек одаларни ҳақоратлаб, ҳайдай бошлашди. Бир ўзбек аёлни ҳақоратлаб, ичкаридан уриб қувиб чиқишди, атрофда кўплаган қирғиз одамлар қараб туришибди, ўзбеклар эса, нари кетишди.
 Бундай ҳолатлар, тез – тез булиб турибди. Сабаби, қирғиз ҳукуматининг 2010 йил июнь ойи урушидан бери олиб бораётган сиёсати, газета ва телевидениядан берилаётган маълумотлар, Ўшдаги ўзбекларни ёвуз, одам ўлдирувчилар ҳамда қирғизларнинг ашаддий душманларига айлантириб, ёмонлаб келишмоқда. Оддий қирғиз ҳалқининг кўпчилиги ўша маълумотларга ишониб қолишган. 
 Бундан ташқари, урушда ҳалок бўлган қирғизларнинг биттаси учун минглаган ўзбекларни ушлашиб, уриб, қийнаб, қўрқитиб, пулларини олишди. Кўпчилик ўзлари жабрланган, бегуноҳ ўзбекларни узоқ муддатларга ва умр бўйи қамоқ жазоларига судлашди. Унинг устига, ўзларича комиссия тузиб, ораларига қўрқоқ ўзбеклардан қўшишиб, ўзбекларни яна айбдор қилишди. Натийжада, қирғиз оддий ҳалқи, ўзбекларни ёмон кўриб, кўчаларда, ҳаттоки милиция, прокуратура ва суд идоралари олдиларидан ҳам уриб хайдайдиган бўлиб қолишди. Ҳолис тергов ўтказгани келган ОБСЕ полициясига қаршилик кўрсатишди. Ниҳоят, эл аро ҳолис комиссия текширувига рози бўлишди. Қирғиз ҳукуматининг сийсати, мана шундай тушуниб бўлмас бўлиб қолди.

 Бир неча мамлакатлардан тузилган комиссиянинг текширув натийжаларини авваламбор ўзбеклар ва қирғизлар ҳам интизорлик билан кутишди. Ниҳоят, 2011 йил 3 майда текширув натийжаларида "Инсониятга қарши жиноят содир этилганлиги аниқланиб, айбдорларни аниқлаб, жавобгалчиликка тортиш, Қирғиз ҳукуматига тавсия этилган ва 2011 йил ноябрь ойигача мухлат берилган”. Шу билан бир вақтда, "Шоқоллар” ҳақидаги икки китоб видео дисклари билан ҳам чиқиб қолди. Айтишларича, бу китобларда Ўшдаги уруш бўйича олинган аниқ видео ва фото суратлар акс эттирилибди. Бошқача айтганда, бу китоблар комиссия ҳулосасини далили бўлибди.
 Энди, масала бошқа тарафда, яъни, айбдорларни аниқлаб, жиноий жавобгарликка тортиш.

 Бу масала четда қолиб, комиссия ҳулосасига ишончсизлик билдиришиб, парламент комиссиясини тузишди. Лекин, мана шу бугунги кунгача, ўзбекларни уйларидан олиб чиқиб, қўрқитиб, уриб, пул талаб қилишлар тўхтаган йўқ. Яна ҳам ноҳақдан судланишмоқда. Менга, кунда бир қанча ҳабарлар келиб туради. Бу ишлар билан биргаликда, миллатлар, яъни қирғиз ва ўзбек ҳалқлари ўртасидаги дўстлик ҳамда бирдамлик ҳақида тинмай сўзлаб, теле кўрсатувлар уюштира бошлашди. Ҳаттоки, баъзилар учун жаноб бўлиб қолган Ўш шаҳрининг мэри М.Мирзақматов ўзбекларни оралаб, дўстлик ҳақида оғиз кўпиртириб қолди. Ўзбекларни иш жойларини очишга чақирди ва ҳакозолар.
 Лаганбардор ўзбеклар ёрдамида, Ўш шаҳар мэриясида 18 май куни ажойиб спектакль ҳам қўйишди. Яъни, 300 атрофидаги лаганбардор ўзбек эркак ва аёлларни тўплаб, "Бизга дўстлик ва тинчлик керак деб бақиртириб, бир нечта китобларни ўтда ёндиртирди. Шу жойда бир нарсани эслатиб қўяман. Июнь уруши тўхтагандан кейин, Президент тайинлаган мэрнинг ўринбосари ўзбекларнинг ичига бориб кўнгил кўтариб, дўстлигимиз ҳамда тинчлигимизни сақлаш ҳақида сухбат ўтказгани учун, М.Мирзақматов уни куч ишлатиб ишдан бўшатган эди. Кўпчилигингиз Темир полвоннинг "Озодлик” радиосига берган интервьюсини эшитгансиз. Ана шу мэрга ишонасизми?
 Яна бир учрашув. Ички ишлар министрининг ўринбосари К.Асанов ташаббуси билан, 20 майда Ўш вилоят ҳокимлигида учрашув бўлди. Учрашув мавзуси "Милиция билан эл ўртасини яқинлаштириш, ҳамда, қирғизлар билан ўзбеклар дўстлигини тиклаш”. Бу жойда ҳам, лаганбардор ўзбеклар оғиз кўпиртиришди. Аммо, бу сафар Рашидхон Ходжаев оғзини очиб ҳам қўймади. У менинг рўпарамда ўтирди. Ҳақийқатни гапира олмаса, жим ўтирса ҳам бўлар экан-ку? Аммо, Ўш шаҳар оқсоқоллар суди райисиман деб ўзини таништирган бир ... соқол, лаганбардорликнинг чўққисига чиқди. Лўттибозларни кўпини кўрганман, аммо, бундайи кам.
 Яна бир ақлга сиғмаган учрашув. Бишкек шаҳридан келган, ўзича инсон ҳуқуқларини ҳимоя қилувчи бўлган Т.Умуталиева, 25-26 майларда Ўш шаҳри ва атроф қишлоқларда ўзбеклар яшаган жойларни айланиб, одамни ғашини келтирадиган чақириқлар қилибди. Яъни, "Кимда қурол бўлса топширсин, мукофотлар тайинланган” дебди ва бошқа, эътиборга лойиқмас сўзларни гапириб кетибди. Бу учрашувларга ҳам лаганбардор ўзбеклар хизмат қилишмоқда, югуриб елиб одам тўплашмоқда. Атрофни эса, милиция босиб кетибди. Шу ҳолда ўзбеклар ҳақийқатни айтадими?
 Мана шу жойда тўхтаб, бўлган ва бўлаётган воқеаларни бир мулоҳаза қилиб кўрайликчи:
 Бошқаларни билмайман, аммо, шаҳсан мен К.Бакиев бошқарувидаги сиёсат, яъни миллатчилик сиёсати ҳамда хар хил миллатлар марказлари, яхшиликка олиб келмаслиги ҳақида кўп ёзиб, 1990 йил июнь фожиасига қараб яқинлашаябмиз, деб огоҳлантирганман. Аммо, давлат бошлиқлари миллатчилик сиёсатини кундан кунга кучайтираверишди. Ва ниҳоят, К.Бакиев қулатилди. Бу ишда, мен ҳам ҳозирги ҳукумат билан бирга ҳаракат қилганман. Ҳукумат ўрнатилгандан кейин, тезлик билан хар хил миллатлардан ташкил топган ҳалқ армиясини, ҳеч бўлмаса дружиналар тузайлик. Акс ҳолда, "Бакиевчилар тайёр бўлиб қолган миллатлар, яъни, қирғиз ва ўзбек урушини чиқаришади. Улар, ҳокимиятни осонликча топшириб кетишавермайди” деб эслатганман. Лекин, ҳокимиятга янги келганлар менга эътибор беришмай, кресло талашиш билан овора бўлиб қолишди. Шундан фойдаланган Бакиевчилар, Ўш шаҳар ҳарбий қурол ва техника сақланувчи омбордан кўплаган қуролларни ўғриликча олиб кетишди. У қуроллар ҳозирги кунгача номаълумлигича қолиб, ҳеч ким ҳеч кимдан сўрагани йўқ. Яна биз билмаган қанчадан – қанча қуроллар йўқолди, буни ўғирлаганлар ва Аллоҳ билади. Аммо, қуролни ўзбеклардан қидиришмоқда.

 Қисқаси, эслаб миянгизга қуйиб олинг! 2010 йил июнь воқеаси, миллатлар аро уруш эмас. Бу, К.Бакиев бошчилигида 2006 йилнинг оҳирларидан тайёрланиб келинган, қирғиз давлатининг ўзбек миллатига қарши бўлган қуролли уруши. 1990 йилги июнь уруши ҳам, ҳудди шундай бўлган. У вақтда видео ва фото аппаратлар бўлмаган, кам бўлган. Шунинг учун, миллатлар аро уруш бўлди, бирини бири тушунмаслик бўлди, дўстлигимизни ва бирлигимизни тиклайлик, бўлган ишларни унутайлик деб, тез орада ёпди - ёпди қилишган. Ҳаттоки, ўша уруш ҳақида эслашни ва гапиришни ҳам қатъиян ман қилишган, эслаб гапирганларни жазолашган ҳам. Алданиб, ҳаромҳўрларни ортидан эрчиган оддий ҳалқ қирғиз ва ўзбеклардан, тенг сонда судлаб қамашган ва 1994 йили май ойида эса, Президент А.Акаев "Амнистияси” билан, ҳаммаларини бир кунда озод қилишган. Кейинчалик, урушнинг устида шахсий манфаатларини кўзлаган ўша вақт юрт бошлиқларимиз турганлигини, биз аниқ билганмиз. Лекин, ўтган ишга саловот, деб қўяверганмиз. Мана шу ҳатойимизнинг эвазига, 2010 йил июнь ойидаги уруш бўлиб, минглаган одамларимиз ҳалок бўлди, оғир жароҳатлар олишди, аёл ва қизларимиз, оналаримиз зўрланди. Ва қадимий, гўзал Ўш шаҳримиз вайронгарчиликка айлантирилди. Энди, 1990 йилги билан 2010 йилги урушнинг фарқини билинг; 
1. 1990 йили миллатлар аро уруш, деб одамларни алдашга эришишган. Чунки, ҳукуматнинг техника ва қуролли кучлари аралашмаган. Бекиниб олишиб, уч кун қўйиб беришган. Уруш видео ва фото съемкаларга кам олиниб, олинганларини ҳам йўқ қилишга эришишган. Чунки, интернет бўлмаган.
2. 2010 йилги уруш, очиқдан очиқ техника ва қуролли кучлар ёрдамидаги бўлди. Буни, миллатлар аро уруш, деб айтиб бўлмайди. Аниқроқ қилиб айтганда, биродарларимиз бўлган бегуноҳ оддий қирғиз ҳалқини гуноҳкор қилиш, катта ҳато бўлади. Бу уруш, бир нечта 5-10 одам, баъзи Бакиевчи ҳукумат ичида юрганлар ва Ўш шаҳар бошлиқлари уюштирган ва ўзбек миллатига қарши уруш бўлди. Аниқ, устида олинган видео лавҳалар интернетга жойлаштирилган. Уларни йўқотишнинг, иложи йўқ. Шундай бўлса ҳам, жон олиб жон бериб тан олмай туришмаябдими?
 Ўта оғир жиноят, ҳукумат тарафидан содир этилди, айбдорлар жазоларини олишлари керак.
 Шунинг учун, ҳукумат бошида турган баъзи бир шаҳслар, айниқса Ўш шаҳри бошлиқлари, қаллоблик қилиб, лаганбардор ўзбеклар ёрдамида, дўстлик ҳақида сафсата юргизиб, одамларни чалғитмоқчи бўлишмоқда. Йўқ, бу сафар бундай спектакль ўтмайди! 

  Энди, "Ўш шами” газетасининг № 23 сонида 12 май 2011 йили босиб чиқилган, ҳаммангизга таниш бўлган, лекин жабр тортмаган 4 (тўрт) лаганбардорнинг лўттибозликларини мисол келтираман. Газетани топиб ўқинг, бундай лаганбардорларни кўрмагансиз: 
 Арофатхон Алимжонова – хизмат кўрсатган ўқитувчи, жамоат арбоби. Унинг сўзларидан лавҳа "Мэрнинг миллий бирлашиш концепциясини қўллайман. Уни тезроқ ишлаб чиқиш ва амалда қўллаш керак”. Бундан бошқа сўзлари ҳам, одамни кўнглини айнитади. Бу аёл, доим тайёр дежурний аёл эди. Уруш бошланганда Ўзбекистонга қочиб кетган. Энди, яна дежурний лаганбардорлар керак бўлганда чақирилганга ўхшайди. У яна ўз ишини бошлабди.

 Хамидилло Исомиддинов – маориф аълочиси. Бу аълочининг сўзларидан лавҳа "Мэр тўғрисида, икки эл ўртасини яна бузиш учун ёлғон-яшиқ гапларни тарқатаётганларни фош қилиш, керак бўлса жавобгарликка тортиш керак. Юртбузарларнинг ғаламис сўзларига эътибор бермай, шаҳарни обод қилишда, элимизни бирлаштиришда давом этаверинг, Мелисбек Жоошбаевич!”. Бу аълочига бир нарсани билдириб қўяй; Биринчидан, қирғиз ва ўзбеклар дўст-биродар бўлиб яшаб келган ва яшашмоқда, яшайдилар ҳам. Бировни бирлаштиришига зор бўлишган йўқ. Сен, юртбузарларни фош қилишга уста бўлсанг, ана Мелис акангдан бошла! Уни тозаласанг, кейин бошқаларига ўтасан. Мана шундай аълочилар, ўзлари юртбузарлардир.

 Бахтиёржон Тўхтаматов – ҳалқ артисти. Бу артистнинг сўзларидан лавҳа "Дўстлик фестивалларини ўтказиб туришса, нур устига нур бўларди. Биз бажонидил бунга ёрдам берамиз”. Бу артист тамошабинсиз қолганга ўхшайди. Артистларни ва тамошабинларни чақириб қолибди. Аммо, артист-да, юқоридагиларга ўхшаб, акасини очиқдан-очиқ мақтамаб, ўзбеклардан сепаратистларни кўрсатмабди. Шуниси ҳам дуруст.

 Дилмурат Ишанов – Амир Темир кичик шаҳарчасининг ёшлар комитети раиси. Бу нонкўр сўзларидан лавҳа "Вақтли ҳукуматнинг қўлида шунча кучи билан ҳаракатсиз қолганда, ёлғиз мэрнинг ўзи нима ҳам қила оларди?”. Тўғри айтасан, Амир Темирга мэрнинг кучи етмай қолди. Сен уйингда писиб ётганингда, одамлар ҳимояга чиқишиб, 60 дан ортиқ йигитлар жонларини фидо қилиб, ҳалок бўлишди, бошқалар қатори сени ҳам сақлаб қолишди. Ҳимояга чиққанлари учун, яна қанча ўзбеклар қамалиб ётишибди. Сен эса, Халилжон акангни нонини унутиб, унга зўравонлик қилиб, ишини тортиб олганга хизмат қилиб, энди уни харом нонини еябсан. Мусулмон бўлсанг, шу шаръий ҳукмни билиб ол! "Зўравонлик билан тортиб олинган жойда, намоз ўқиш ҳаромдир”. Ҳозирги кунда, сен ишлаётган жойда, сен учун нафас олиш, сув ичиш, овқат ейиш ҳам ҳаромдур.
   
 Мана шу тўрт мунофиқ, лаганбардорларни сўзларини ўқисангиз, худди ўргатилган "Тўти” қушнинг бақириғини эшитгандай бўласиз. Лекин, улар ҳам ҳақийқатни билишади. Аммо, очиқ айтишдан акаларидан қўрқишади, жонлари ширин. Улар, дунёга устун бўламан деган одамлардан. Ўлимдан қўрқишади, дунё ҳаётини севиб яшаган, лўттибозлардур. Уларда, на инсоний ғурур, на шижоат бўлсин. Яна улар, акаларига қўшилишиб, миллатларни бириктиришдан сафсата сотишмоқда.
 Ахир, тўда бўлиб юрган эшшаклар ҳам, биз эшшакларни бириктириб қўйинглар демайди-ку.
 Яна, учинчи кучни қидириб топишолмаябди. Уларни мэриядан қидиринглар!
  Барчаларингиз билиб олинг ва ҳақийқатни айтишдан қўрқманг, фақат Аллоҳдан қўрқинг!
 2011 йил июнь урушида оддий қирғиз ва ўзбек ҳалқларининг айблари, фақат уларнинг илмсизликларидир. Тўғридан тўғри айбдорлар, урушни 3-4 йил давомида тайёрлаб келган К.Бакиев ва унинг ҳозирда ҳам ҳукумат ичида ишлаб турган малайларидир. Уйингизни куйдириб, яқинларингизни ўлдирган оддий одамлар ҳам адашганлар, уларга дориланган сув ва ароқлар ичиришган. Улар қилган ишларини билишмаган. Бу ишларда, сизлар тушунмайдиган сирлар кўп, 1990 йили ҳам худди шундай бўлган. Аммо, жиноятчи бошлиқлар жазодан қутулиб қолишмоқда. 
 Бу сафар, ҳамма жиноятлар ҳукумат тарафидан очиқ содир этилди. Энди буни, яширишнинг ҳеч ҳам иложи йўқ. Сунъий илжайишлар, яраш-ярашлар, фақат ҳукуматдаги одамларнинг найранглари, жиноий жавобгарчиликдан қочиш услуби. Ва бу ҳаракатлар, мунофиқ, лаганбардор, ифлос, қўрқоқ ўзбеклар ёрдамида бўлмоқда. Аммо қирғиз дўст-биродарларимиз бирин – кетин ҳақийқатни билиб келишмоқда. Улар, жиноятчиларни жазосиз қолдиришмайди. Фақат, лўттибоз ўзбеклар жим турсин.
 Бу сафар, ҳақиқий жиноятчиларни жазоланмаса, бундай ишлар яна қайталанилади. Биз кўрмасак, фарзандларимиз кўришади. Шундоқ ҳам, ўзбек ҳалқининг номига қора чоплашди. Лекин дунё ҳалқи, қирғизларни номига қора чоплашмоқда. Бу эса, қирғиз биродарларимиз учун ҳам зиён.
 Бошқача айтганда, июнь уруши иккала ҳалқнинг ҳам келажак авлоди учун катта зиён.
 "Ҳар қандай йўл, биринчи қадамдан бошланади, шунингдек, жиноятга йўл ҳам”. Бизда эса, 1990 йили оғир жиноятга биринчи қадам қўйилди, 2010 йили эса, иккинчи қадам босилди. Аллоҳ Ўзинг сақлагин, мусулмонларни Ўзинг ҳидоят қил. Учинчи, ҳавли қадамдан сақла. 
 Бунинг учун, бошлиқ жиноятчилар аниқланиб, ўз жазоларини олишлари керак. Фақат шундагина, икки ҳалқ таскин топади ва тинч ҳаётларини кечиришади. Бундан бошқа йўл йўқ.
 Сохта учрашувлардан оёғингизни тийинг, ақлингиз ва илмингиз етмаган ишларга бурнингизни тиқманг, бошқа зарур ишингиз билан шуғулланинг. Учрашув бўлса, мана мени чақиришсин ёки сиз борсангиз, фақат мен билан боринг. Ўзингиз кўрасиз, мени алдаб ёки қўрқитиб кўришсин-чи.
 Орамиздаги ифлосларни ҳисобга олмаганда, қирғиз ва ўзбеклар - бир тан-у бир жон, ака-ука биродардурлар. Шуни асло унутманг!

 Инсон ҳуқуқлари ҳимоси маркази "Адолатлик ва ҳақийқат” Ўш 
 шаҳри моб: (+996) 543 818 056. Гапиров Равшан Бердишевич / / 28.05.2011 й.
  ravshanosh@mail.ru ravshan1955@gmail.com www.gapirov.ucoz.com





Просмотров: 994 | Добавил: Gapirov | Рейтинг: 1.0/1
Всего комментариев: 0
Имя *:
Email *:
Код *: